موقع الشاعر هاشم صديق

مزامير الزمن ناحت 
على الحب الفتر ولّى
وبقيت مصلوب 
على الجرح الصعب والليل 
وحيد في مسرح الهجرة. 

مطارات السفر يا ليل 
بكت من ظلمة الرحلة 
وشبابيك الغرف جنّت 
مِن الأحزان وبالذكرى

أشيل قلم الصبُر وأكتب: 
عن الجبل الشهق حسرة 
عن الحُب النزح في التيه 
ومات بي سَكتةالعِرفة
عن الأرض..الزمن..الشوك
عن الجمرة الأبت تصحا
عن الصاحِب وكِت يسقط
عن الصدق الصبح ضحكة.
أشيل قلم الحلم وأرسم 
مَلامِح لي فرح مجنون 
وأعود أمحا.

وحيد في الأرصفة المغسولة 
بالمطر النزف فجأة
صقيع الغربة في عضمي 
وشقا التلِج الصبح لعنة.
قِطارات المُدُن تهدر 
تقيف لحظة 
تشيل جِسمي 
و تَجِر لمحة
وحيد في مقعَد التذكار 
أفكّر في سَما الحِلِّة
أسامِر فى مراكب النيل 
وأرتل في غُنن الشُلة.
قطارات المدن تهدر 
تقيف لحظة 
تفوت جسمي
و تغيب لمحة
وحيد تاني 
وحيد في الأرصفة المغسولة 
بالتلج الصبح لعنة
أنا المستني زي مجنون 
شمس مرسال من الخرطوم
وزول واصينو شان يحقن 
عروق الغربة بالفرحة
أنا المستني ريد مجهول 
أنا............
ويموت حلمي 
وأعود اصحا 
وأعود أصحا