انت هنا في: الرئيسية المكتبة المقروءة شعر كتابي شجون وطنية .. شعر هاشم صديق .. قصيدة جديدة

موقع الشاعر هاشم صديق

شجون وطنية
 

شعر:هاشم صديق

(1)

( الكلب إنبح

والجمل ماشي)

الضحك فرقع

والجرح إنتح

العذاب إصرخ

والملك إفرح

الجزم بالكوم

والقدم حافي

البلد مسروق

وسارقو بالكاكي .

.......

(2)

صباح الجمعة

كت مشتاق

أزور لي قبر ( أبوي صديق)

مشيت ولهان

(لي حمدالنيل)

لقيت إسم القبر مافي

جريت محزون

أفتش في القبور وأصرخ

تقول مجنون

(ياقبر أبوي)المنسي

مجدوع في الفيافي

وشاهدو موصوف

للغلابة

قول لي نزيلك

أصحا يابا

أصحا يابا

وقول حكايتك

للمواليد الجديدة

وغني للطين والحرابه

صحي أموات المدينة

صحي أموات المدينة.

........

(3)

مشيت يا روحي لو تدري

علي (الميدان)ومن بدري

أعاين في الأرض ولهان

أفتش عن دم الصبيان

ومشتاق لي رسوم زاهية

رسمت حكاية الثورة

في جدران

وأسأل في السكون محموم

وين الثورة والبمبان ؟

لقيت الصنة بتجاوب

لا صبيان

لا بمبان

.......

بس هيئة الأركان

وعاينت ولقيت كباشي

( ياالكبااااااااااااشي)

وشوفت (حميدتي) والبرهان

يا دوب فهمت

منو السرق

دم الصبيان.

.......

رجعت أناجي في جرحي

وأتحسر علي الثورة

وعلي السودان .

........

(4)

وجعك غريب

آآآه يا وطن

مرجيحة

في شجرالرهاب

وعودك مدشدش

من قرايب

ومن صحاب

وشوفك صرخ

من طعنة

من نَصْل السِحاب

بلدك عجب

خملانة

في رمل الضباب

داسوها

بي جِزَم العسس

لاكوها

بي ضُرس العذاب

دفنوها بالحيا

في التراب .

.....

(5)

توقيع

.......

أمس حلمان

نساني الجوع

صحيت مخلوع.

 

هاشم صديق _ أبوظبي

17 يونيو 2021

 
فارماس ... هو شخصية الشاعر و المغنى
 الذى يرمز للثورة فى مسرحية نبتة حبيبتى
وهو الذى إستطاع أن يغيِّر عادة ذبح الملوك
بالشكل الإنقلابى التى كانت تتم فى
الأسطورة القديمة وفى المسرحية
على السواء...
وهو فى النهاية يرمز إلى الإبداع فى
تغيير الوعى وتفجير الثورة وتغيير
النظم السياسية المستبدة

شـــــــــــرف الكـــــــــلام

أنا المديت شراع أفكاري
  في بحر الزمان تهت
طويت الدنيا بالأفكار
محل ما تميل أكون ملت
من الغالي وعظيم القول
 كتير مديت ايدي شلت
وشان الكلمة شرف الرب
وشان الناس تحس تطرب
وقفت أنادي في الأزمان
طهارة الكلمة في الفنان
وصدق الحرف في صدقو
وحصاد اجيالنا في شتلو
ولو داس الشرف خانو
قلوب الناس تسد الباب
تعاند طبلو والحانو

إحصاءات

زيارات مشاهدة المحتوى : 9425102

المتواجدون حاليا

يوجد حاليا 189 زوار المتواجدين الآن بالموقع
{jatabs type="modules" animType="animMoveHor" style="trona" position="top" widthTabs="120" heightTabs="31" width="100%" height="auto" mouseType="click" duration="1000" module="ja-tabs" }{/jatabs}